Joh 7 | NdeIBE | STEP | Ngemva kwalokhu uJesu wahambahamba eGalile, kazathanda ukuya eJudiya ngokuba abaJuda balapho babefuna impilo yakhe.

John 7

UJesu Uya Edilini Lezihonqo

1 Ngemva kwalokhu uJesu wahambahamba eGalile, kazathanda ukuya eJudiya ngokuba abaJuda balapho babefuna impilo yakhe. 2 Kwathi umkhosi wabaJuda oweDili leZihonqo ususondele

3 abafowabo bakaJesu bathi kuye, “Sekumele usuke lapha uye eJudiya ukuze abafundi bakho babone imimangaliso oyenzayo. 4 Kakho umuntu othi efuna ukuba lodumo asebenzele ensitha. Njengoba usenza izinto lezi ziveze ebantwini.”

5 Phela labafowabo babengakholwa kuye.

6 Ngakho uJesu wabatshela wathi, “Kasikafiki isikhathi esilungileyo kimi; kini lasiphi isikhathi sililungele. 7 Umhlaba ungeke ulizonde, kodwa mina uyangizonda ngokuba ngiveza ukuthi lokho okwenzayo kubi. 8 Hambani lina eDilini. Mina kangikayi eDilini leli ngoba kimi kasikafiki isikhathi esiqondileyo.” 9 Esetsho lokhu wazihlalela eGalile.

10 Kodwa ngemuva kokuba abafowabo sebehambile eDilini laye waya khona, hatshi obala kodwa wahamba ensitha. 11 Khonapho eDilini abaJuda babemlindele bebuza besithi, “Ingaphi indoda leyana?”

12 Phakathi kwamaxuku abantu kwakulokunyenyezelana ngaye. Abanye bathi, “Ungumuntu olungileyo.” Abanye baphendula bathi, “Hatshi, ukhohlisa abantu.” 13 Kodwa kakho owakhuluma ngaye obala ngokwesaba abaJuda.

UJesu Ufundisa EDilini

14 Kwathi isikhathi somkhosi sesiphakathi laphakathi uJesu wasesiya egumeni lethempeli waqalisa ukufundisa. 15 AbaJuda bamangala, babuza bathi, “Indoda le yaluzuza kanjani ulwazi olungaka na yona ingafundanga?”

16 UJesu waphendula wathi, “Imfundiso yami kayisiyami mina. Ivela kulowo ongithumileyo.

17 Uma umuntu ekhetha ukwenza intando kaNkulunkulu uzabona ingabe imfundiso yami ivela kuNkulunkulu loba ngiyazikhulumela.

18 Lowo ozikhulumelayo wenzela ukuzizuzela udumo, kodwa lowo osebenzela udumo lwalowo omthumileyo ngumuntu weqiniso; kakulankohliso kuye. 19 UMosi kalinikanga yini umthetho? Kodwa kakho lamunye kini owugcinayo umthetho. Kungani lifuna ukungibulala na?”

20 Ixuku labantu laphendula lathi, “Ukhwelwe ngamadimoni wena. Ngubani ofuna ukukubulala?”

21 UJesu wathi kubo, “Ngenza ummangaliso owodwa lamangala kakhulu lonke. 22 Kodwa ngokuba uMosi walipha ukusoka (loba iqiniso liyikuthi kakuvelanga kuMosi kodwa kubokhokho), liyamsoka umntwana ngeSabatha.

23 Manje-ke uma umntwana engasokwa ngeSabatha, kungabi yikuwephula umthetho kaMosi, mina lingizondelani ngokuthi ngisilise umuntu ngokupheleleyo ngeSabatha na?

24 Khawulani ukusola ngokubona kwamehlo, lahlulele ngokuthi ulutho luqondile.”

UJesu UnguKhristu Na?

25 Ngalesosikhathi abanye abantu baseJerusalema babuza bathi, “Kanti kasuye yini umuntu lo abafuna ukumbulala na? 26 Nangu phela ekhuluma egcekeni kodwa kabatsho lutho kuye. Kambe ngabe iziphathamandla sezibone ukuthi nguye uKhristu na? 27 Kodwa siyakwazi thina lapha indoda le edabuka khona; nxa uKhristu esefika, kakho ozakwazi lapho avela khona.”

28 Kwathi uJesu elokhu esafundisa egumeni lethempeli, wamemeza wathi, “Yebo, liyangazi, njalo liyakwazi lapho engivela khona. Kangizizelanga lapha, kodwa lowo ongithumileyo uqinisile. Kalimazi, 29 kodwa mina ngiyamazi ngokuba ngivela kuye, nguye ongithumileyo.”

30 Besizwa lokhu bazama ukumbamba kodwa kakho owambeka isandla ngokuba isikhathi sakhe sasingakafiki. 31 Loba kunjalo, abanengi exukwini labantu bakholwa kuye. Bathi, “Nxa uKhristu angafika, kambe uzakwenza imimangaliso okwedlula umuntu lo?”

32 AbaFarisi babezwa abantu benyenyeza izinto ezinjalo ngaye. Abaphristi abakhulu labaFarisi basebethuma amanxusa ethempelini ukuba ayombopha.

33 UJesu wathi, “Ngikhona lani okwesikhathi esifitshane, besengihamba ngisiya kuye ongithumileyo.

34 Lizangidinga kodwa lingangifumani; lalapho engikhona lingeke lize khona.

35 AbaJuda babuzana bathi, “Umuntu lo ufuna ukuya ngaphi lapho esingeze samfumana khona na? Uzakuya ebantwini bakithi abahlakazekileyo abahlala phakathi kwamaGriki, afundise amaGibhithe na? 36 Ubesitshoni esithi, ‘Lizangidinga kodwa kaliyikungifumana,’ njalo wathi, ‘Lapho engikhona lingeke lize’?”

37 Ngelanga lokucina ilanga elaliqakatheke kakhulu eleDili, uJesu wasukuma watsho ngelizwi elikhulu wathi, “Aluba ekhona owomileyo keze kimi azonatha. 38 Loba ngubani okholwa kimi, njengoba uMbhalo utshilo, imifula yamanzi aphilayo izageleza ngaphakathi kwakhe.”

39 Ngalokhu wayesitsho uMoya, okwakuzakuthi labo abakholwa kuye bamamukele ngesikhathi esizayo. Kusiza kulesosikhathi uMoya wawungakanikwa ebantwini, njengoba uJesu wayengakakhazimuliswa.

40 Sebewazwile amazwi akhe abanye babantu bathi, “Ngeqiniso umuntu lo nguye umphrofethi.”

41 Abanye bathi, “Unguye uKhristu.” Abanye njalo babuza bathi, “Kungenzeka kanjani ukuthi uKhristu avele eGalile na? 42 UMbhalo kawutsho yini ukuthi uKhristu uzavela kusendo lukaDavida, eBhethilehema, umuzi lapho uDavida ayehlala khona.” 43 Kanjalo abantu badabukana phakathi ngenxa kaJesu. 44 Abanye babefuna ukumbamba, kodwa kakho owambeka isandla.

Ukungakholwa Kwabakhokheli BabaJuda

45 Amanxusa ethempelini acina esebuyela kubaphristi abakhulu labaFarisi abababuza bathi, “Kungani lingezanga laye?”

46 Amanxusa afakaza athi, “Kakho osewake wakhuluma njengomuntu lo.”

47 AbaFarisi babakhwazela bathi, “Litsho ukuthi lani uselikhohlisile? 48 Ukhona na kubabusi loba kubaFarisi osebeke ithemba lakhe kuye?

49 Hatshi! Kodwa inkunkuma yabantu le engazilutho ngezomthetho – bathukiwe.”

50 UNikhodemu owayeye kuJesu mandulo, owayengomunye wabo wabuza wathi, 51 “Kanti umthetho wakithi uyamlahla na umuntu kungaqalanga kwezwiwa kuye ukuthi yena uthini?”

52 Baphendula bathi, “Lawe uvela eGalile yini? Ake ukudingisise, uzabona ukuthi kakulamphrofethi ongaphuma eGalile.”

53 Bonke base bechitheka, ngulowo waya kibo.